ياليتني

ياليتني كنت معك
أقضي وقتي اسمعك
أقضي نهاري بالقرب منك
أقضي مسائي أشكو اليك
ليت لي عمر أهبه اليك
أقضيه كله ملك يديك
لعل قلبي يلين بك
أو تفيض روحي بين يديك
فأٌبعث ضاحكةً كما تركتك
نفسي مطمئنة لوجهك
لأقابل ربي وربك

خواطر إيمانية" الغاية"

خواطر الشعراوي اليوم كانت عن"الغاية" و"الوسيلة" و"الغايات قصيرة المدي" و"طويلة المدي"

يعني vision, mission, short term goal and long term goal

بجد صدمت انه كان بيصنف أفعاله علي هذا لأساس وكان يدعوا الناس لهذا منذ زمن وإلي الآن يوجد من ليس لهم غاية من الحياة!

تخيل اللي بيعيش حياته عشان حاجة ويموت قبل ما يوصلها! يبقي معملش حاجة في دنيته؟! تخيل احنا بندرس كام سنة؟ 2 kg  و 6 ابتدائي و 3 اعدادي و 3 ثانوي و من 4 ل 7 جامعة يعني ال average كده 19 سنة! 19 سنة من حياتك بتدرس هو انت عمرك قد ايه اصلا؟! ولا احنا اصلا ضامنين اننا نكمل ال 19 دول؟!

أكيــد مش هدفي أقولك سيب التعليم :D  الهدف انك تراجع نفسك! هل انت مغتنم وقتك وصحتك كشاب؟ هل دي قدرتك وبس؟! هل يوم القيامة هتقول لربنا أصل كنت بتذاكر ؟ طب ما أنت ياما ضيعت أيام علي ال facebook  أو قدام التليفزيون, ساعات في التليفون أو الخروجات وممكن تكون كمان بتذاكر آخر وقت قبل الامتحان!

أنت في ال 19 سنة دول ممكن تتعلم حاجات كتيرة أوي! ممكن تتعلم لغات, حرفه, تلعب رياضة , تساعد فقراء , تمحي أمية واحد!

 ممكن تعمل مليون حاجة !!  حط لنفسك أهداف قصيرة المدي عشان متبقاش سبت الدنيا واسمك كنت بتحاول انك تغير فيها بس لأ كمان تبقي سبتها وأنت سبت فيها تأثيرات ولو صغيرة .

بس أغتنم وقتك  =)

ده مش كلام الشعراوي بالنص بس هو كلام جه في بالي لما اتكلم في هذا الموضوع للأمانة =)

لما تضيق

ساعات كده الدنيا بتظلم أوي وتحس ان كل حاجة ضدك وإن مفيش حاجة ماشية صح أو زي ما انت عايز.
الفترة اللي فاتت في حياتي دي تقريبا اسبوعين حصل فيهم أبشع المواقف وعلي رأي المثل "أطلع من حفرة أقع في دحديرة" :D
وكانت الطامة الكبري يوم الجمعة صاحية بدري تعبانة ومريضة ورغم ذلك متشوقة جدا لرؤية تعب فترة فاتت وأنا رايحة مقصدي قلت أجيب مياه ومناديل من كشك أظن دي حاجة مفهاش حاجة تحصل تضايق يعني :D  أقصاها ايه!?معندوش مياه؟ فاكس هاجيب من واحد تاني :D   بس لأ أنا تفوقت علي كل حاجة واللي حصل ان وأنا واقفة بشتري قام هواء جامد جداااا وسمعت صوت زجاج بيتكسر ولقيت خير اللهم أجعله خير أمطار من الزجاج تهبط  عليا! تسألوني الكشك حاطط لمبات ليه! معرفش, ايه اللي قوم الهوا وأنا تحت اللمبات برضه معرفش :D
احساسي ساعتها!  تتنيحة عجيبة, شعور غبي! بإن دي أول حاجة في اليوم من أول ما نزلت من البيت! أنا ايه اللي جابني الكشك ده أصلا أنا عمريييييي ما اشتريت منه!
الحقيقة اني اتعلمت حاجتين من الموقف ده حاجة ساعتها وحاجة بعدها
أول حاجة: انا بعد التتنيحة أنا طلعت مني "الحمد لله" من غير ما أحس كده للحظة حسيت هو كان هيحصلي ايه لو كنت باصة لفوق؟!  أو ان حتت الزجاجة اللي وقعت علي ايدي فتحتهالي!
حسيت بجد ازاي ربنا حماني كده! ازاي رحمني كده وسترها معايا كده!
تاني حاجة اتعلمتها ان مهما كانت الدنيا ضدك وكل الظروف بتزنقك وكأن الدنيا بزنقك في كورنر وبتقولك قول أنا يئست فقولها لأ عشان محدش ييأس برحمة ربنا =)


قال الغزالي : إذا رأيت الله يحبس عنك الدنيا ويكثر عليك الشدائد والبلوى ..فاعلم أنك عزيز عنده .. وأنك عنده بمكان ... وأنه يسلك بك طريق أوليائه وأصفيائه .. وأنه .. يراك ..
أما تسمع قوله تعالى .. (( واصبر لحكم ربك فإنك بأعيننا))




فبمنتهي البساطة قول يا دنيا ياللي معنداني! أحب أقولك ان ربي مالك الملك اللي انت جناح بعوضه في ملكه مفارقنيش لحظة =)
أحبك ربي

خواطر إيمانية " حجمك الحقيقي"

عشان توعد بقلب جامد أو تتوعد لحد لازم تعرف قدرتك الحقيقية وحجمك
يعني كام واحد فينا بيقول "أنا هوريه"! و "أنا هطلع عينه بس لما أشوفه بس" !
خواطر الشيخ الشعراوي في الموضوع ده كانت 3 اسئلة:
1. أنت ضامن عمرك؟ ضامن تعيش للثانية الجاية؟
2. انت ضامن عمر الشخص ده؟
3. أنت ضامن حالة قلبك ساعة لما تقابله؟ مش يمكن مقلب القلوب يخليك تهدأ ساعتها!
عشان أي فعل يتم فلازم يتوفر 3 أشياء الفاعل, المفعول به وقدرة
وأنت لو عرفت تجاوب ال 3 اسئلة دول فيبقي عرفت ان مش بإيدك ولا ركن من أركان الفعل.
فحينما تعد أو تتوعد تذكر قول الله تعالي "وَلا تَقُولَنَّ لِشَيْءٍ إِنِّي فَاعِلٌ ذَلِكَ غَدًا.إِلاَّ أَن يَشَاء اللَّه"(الكهف 23)


شوف الفرق بقي في وعد الله, في قول الله تعالي "أَتَى أَمْرُ اللَّهِ فَلا تَسْتَعْجِلُوهُ سُبْحَانَهُ وَتَعَالَى عَمَّا يُشْرِكُونَ " (سورة النحل 1 )
طب ازاي أتي و فلا تستعجلوه؟ ماهو أتي خلاص!
هنا هو وعد من الله وليس بماض, يعني؟
يعني لما ربنا يوعد فهو له الفاعل فلا راجع لأمره, وهو متحكم في المفعول به ولا قدرة له على عصيانه فإن قال كن فقد كان وله القدرة على تسبيب الأسباب, فحينما يعد الله فقد أصبح الفعل في الماضي ثقةً بالله عز وجلّ =)
فتذكر قبل كل فعل قدرتك وهل أنت المسبب أم الله عز وجل وأنه عندما يعد الله فإن كنت تثق في الله عز وجلّ فخذ كلام كأنه حدث بالفعل =)
رحم الله الشيخ الشعراوي و أثابه عنا خيراً كثيراً مباركاً .

أبسط من كده

ساعات كتير الواحد لما حد اكبر منه ينصحه يقعد يقاوح وتلف بيه الأيام وتثبت له ان كلام الحد ده كان صح، ولله المثل الأعلي.

شاهدت فيديو بيتكلم عن الغضب وانه شعور طبيعي بينتاب البني آدم ولكن ايه المسبب الأساسي له؟ ال

frustration

يعني انك تكون عاوز ومتخودش، زي مثلا انك تصحي نفسك تأكل الكيكة اللي بتحبها فتلاقي حد خلصها، او ان كان نفسك تخرج والخروجة اتلغت موقف فوق موقف فوق موقف بيسبب الغضب، عند هنا انا كنت فصلت خلاص من الرجل اللي بيتكلم مر في دماغي

مليون حاجة، مر ان ربنا قال اننا نرضي بالقدر وان

عَسَى أَنْ تَكْرَهُوا شَيْئًا وَهُوَ خَيْرٌ لَكُمْ وَعَسَى أَنْ تُحِبُّووَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ"

صدق الله العظيم  " 

في حياتنا حاجات كثيرة اوي لو بطلنا نتضايق عليها كنا هنكون اسعد بكتير، كانت حياتنا هتكون ابسط من كده بكتير.

الدنيا ليست بدار بقاء انما هي مؤقته ممكن نعتبر اننا راكبين طيارة مسافرين لجهة معلومة ألا وهي "الجنة" ان شاء الله فامش لازم كل حاجة تاخدها علي الطيارة استني لما تنزل وساعتها اعمل اللي نفسك فيه، مبقولش نبطل نتمني، تمني ولكن لا توقف حياتك او سعادتك علي هذه 

الأمنية عشان مش دي اخرة الحكاية 

لينك الفيديو: 

http://www.youtube.com/watch?
feature=endscreen&v=6UP6WV801Qg&NR=1

متبقاش رخيص!

مرورا من أمام احدي تجمعات المقاهي المشهورة في القاهرة مر من امام سيارتي 5 اولاد فعلا ضايقوني! مش عشان الألوان الزي لابسنها وان عادي ولد يلبس بنطلون احمر! بس سيبناومن دي، دي اذواق لكن اللي احزنني بجد! ان اللي مطول شعره ورابطه بتوكه للوراء واللي لابس الكابيشو وماشي ماشية المغنيين الزنوج الأمريكيين واال لابس مسقط بنطلونه، حسيت بجد هو ايه المنظر ده! ليه الناس بتتوهم بأي منظر أجنبي فعلا "عقدة الفرنجة" أي حاجة جاية من برة تحفة و واو حتي لو نعارضة لتقاليد بلدك لأ وحتي لو معارضة لدينك، هو ليه هما اللي بيطلعوا الموضة واحنا نقول آميين؟ ليه مش احنا اللي نطلع الموضة؟ اتباعنا لموضة بهذه الطريقة العيميانية حاجة من اتنين يا إما شايفنهم احسن مننا فلازم نسمع كلامهم عشان نبقي كويسيين أو اننا بنحاول نرضي الناس وبس. فكر كويس قبل ما تجيب حاجة وتلبسها انت جايبها ليه؟ عشان عجباك ولا عشان تعجب الناس، خلي عندك شخصية ويوم ما تحب تقلد حد فقلده في اللي يفيدك مش تقليد أعمي وبس! وبالنسبة للبنات بالذات سؤال ليه اللي الموضة بتفرضه عليكي مش قيد واللي ربنا بيأمرنا بيه قيد؟ ولا عشان ده بيعجب الناس واللي ربنا عايزه مبيعجبش، راجعي نفسك وشوفي بتعبدي ميين فيهم ملحوظة: مش بقول ان اللبس اللي وصفته ده ضد الإسلام انما اقصد بالجملة دي لبس البنات

عن إتقان العمل

"لم أر في عيوب الناس عيبا.... كنقص القادرين على التمام"


بيت للمتنبي بدأ به حديثه شخص من الأشخاص الذين احترمهم بشدة وأفادوني كثيرا.
حفظته أول ما سمعته ودارت في دماغي مليون حاجة وحاجة
جه في بالي كل من يقول فاكس كده كفاية عليهم
جه في بالي كل ما من يقول علي قد فلوسهم
جه في بالي كل طالب بيقول كفاية مذاكرة ليلة الامتحان
جه في بالي كل مسئول ببيقول يحمدوا ربنا اني عبّرتهم!


اتق الله في عملك اتق الله, اتق الله, اتق الله
فقد قال رسول الله :"إن الله يحب إذا عمل أحدكم عملا أن يتقنه "