نعمة...

كانت تلك النظرة العاجزة المعتذرة الممتلئة بالحزن العميق , وشفتين علتهما ابتسامة أمل لا يري النور ، نظرها لزوجته المبتسمة ببراءة جاذبة ليده تجاه أحد المحلات التي لا يحلم بدخوله فقط ليس حتى بالشراء منه!

أخذت تجذبه وتضحك ضحكات بريئة تعبر عن سعادتها وانبهارها بما تراه وهي تردد

"إيجي نتفرج هنا"

فجذبها وفي عينيه تلك النظرة وأكملوا طريقهما ومازالت عيناها متعلقتان بالمحل.

إنه حلم لهما ومعتاد لنا ..

مُنعا من حتى الدخول , ونحن ندخل ونشتري ما يحلو لنا.

انك لست فقير هي نعمة!

فلتراجع نعم الله عليك مهما بدت لك تافهة, فبعد رؤيتي لهذا المشهد أدركت ان مجرد تمكني من دخول اي محل حتى دون أن اشتري منه بدون أن يتم طردي لهيئتي نعمه ....

                                                                       حدث بالفعل ....

لحظة في الجنة

في الجنة مالا عين رأت ولا أذن سمعت ولا خطر علي قلب بشر, عشان كده في أوقات بتخيل مع نفسي ياتري هاتكون عاملة ازاي؟ وهاعمل ايه فيها وباتبسط أوي وبعد ما أخلص تخيل باتبسط أكتر عشان بحس ان لما أنا اتبسط كده من اللي تختيلته أٌمال اللي ربنا هايديهولي هايكون شعوري بيه ايه!! ربنا يكبتنا من أهل الفردوس الأعلي.

من أكتر اللحظات اللي منتظراها رؤية وجه الله تعالي هاتبقي لحظة لا توصف تخيل انك تشوف حب حياتك! من هو قيوم علي كل ما يخصك من يوم ميلادك! من يرزقك ويحبك, من كان بك رحيم رءوف , منا كان لك عونا وسندا ومجيبا!

ولحظة لما اشوف الرسول ويعرفني ويسلم عليّا واتمني اني اشوف في عينيه انه فخور بيا.

وطلب غريب شوية بس هاطلبه من ربنا ان شاء الله, ألا وهو ان ربنا يوريني حكمته في كل شئ قدّره لي من أكبر حاجة لأصغر حاجة, مش عشان مش راضية بحياتي دلوقتي, بس عشان اشوف جميع نعم ربنا عز وجل عليّ اللي انا مش حساها دلوقتي ومش قادرة ادرك انها الخير ليا.

تخيل كده ربنا بيوّريك حكمته في كل حاجة حصلتلك وليه بالطريقة دي بالذات! ليه صاحبت الشخص ده وليه مش واحد تاني! ليه الخروجة دي محصلتش, ليه منع عنك حاجة كان نفسك فيها, وليه أخر عنك حاجة؟ وتشوف ان كل ما اختاره لك مكنش في أحسن منه وإن السيناريو التاني كان هايخليك غير سعيد.

دايما لما يبقي نفسك في حاجة أوي وماتحصلش تخيل أي حاجة وحشة نسبة حدوثها صغيرة جدااا انها كانت هاتحصلك لو الحاجة اللي نفسك فيها حصلت, مثلا تخيل انك لو كنت خرجت الخروجة الفلانية كنت اتزحلقت من شوّية ماية في الأرض ورجلك اتكسرت! نسبة حدوثها صغيرة أوي بس كانت ممكنة!

كل حاجة حواليك, كل حاجة في حياتك خير! المهم انك تشوفها خير وتثق في اختيارها لك.

لحظة سأشعر فيها بكل نعم الله عز وجل عليّ وأدرك كم كان رحيم بي وكم كنت جاحدة

مُتناسية

عجبي لكل فتاة تظل تائهةً

تبحث عن محبوبٍ يملئ قلبها

وهي لها أعظم محبوب في وجودها

تطلبه يسهر لراحتها

أو يسمعها شعرا في حبها

تطلبه شهماً قوياً حافظاً لحقها

تطلبه عطوفاً حنونا يمسح لها دمعها

ويبذل ما يستطيع لإسعادها

يمسح أي غشاوة حزنٍ عن قلبها

وتطالبه ألا يكف عن حبها

كم هي حالمة

فلن تجد من في كمال أحلامها

وكم هي متناسية

ربٌ كريم وهب لها

أعظم مما يوم حلمت به

فهو قائمٌ مدبر أمرها

من يوم أن كانت في رحم أمها

وإن احتاجته لتحادثه فهو حيٌ لا ينام

متواجدٌ ليلاً أو نهار

وأنزل إعجازا لها في اللغة

ليصف لها عظمته

وإن ظُلمت أقسم بعزته وجلاله

أن يُرجِع لها حقها

وإن يومٍ شعرت بحزنٍ لا يذكرُ

محاه عن قلبها بما يسرها

ومهما ابتعدت أو أذنبت

وجدته معطائاً كريماً لا يتوقف يوماً عن رزقها

ويرسل إليها من يدلها علي طريق رجوعها له

فيا من تطلبن الكمال ولم يُخلق

لكن الفخر أن حبيبكن كاملُ

----------------

يمكن يكون الكلام ده مثالي أوي وصعب تحقيقه كله لإننا كبشر خلقنا باحتياجات ومشاعر وإننا محتاجين اللي نعتمد عليه بعد ربنا سبحانه وتعالي بس ده للتذكرة بمن من حقه أن يملئ قلبك قبل أي رجل..لنتذكر نعمه علينا وأعظم قصة حب ولكننا لم ندركها =) 

رسالة للمُقيم

أأمِنت ُمكرها أم ألهاك حسنها

فعبدت أهلها

أم نسيت أن لا أمان لها

وأنك ذاهبٌ فمفارقها

وتارك كل مباهجها

ولن يبقي إلا مساوئها

وعواقب عبادتها

وطاعة لذاتها

تذكر ذهاب لذات مطامعها

وأنك عابِرُها

إلي خُلدهنيئا, مُكّرِم ٌ لزاهِدُها

أو عذابا شديداً لعابدها 

لحظة مواجهة 6

1. ربنا هداكى للحجاب؟ ولا أُجبرتي عليه؟
2. أياً كانت اجابتك: فبتلبسي ايه؟
3. وأياً كان ال style بتاعك مواصفاته ايه؟
4. بيصف؟
5. بيشف؟
6. بتلبسي قصير و  boot?
7. ولا legging  واي حاجة عليها عادي؟
8. ولا تلتين وفاكرة انها "الوجه والتلتين" ؟ مش "الوجه والكفين"؟؟
9. تخيلي وربنا بيبصلك كل يوم وبتكون نظرة رضا؟
10. من الآخار لو رجل عينه وقعت عليكي هايضطر يدور وشه الناحية التانية ولا انتي اصلا حجابك محتشم؟


اترك لكي الإجابة والقرار

لحظة مواجهة 5

1. لما اتنين بيكلموك في نفس الوقت بتكون مركز مع الأثنين ولا مع واحد بس؟
2. طب لمت تبقي بتتفرج علي فيلم وحد يجي يكلمكمش بتقوم عامل للفيلم pause?
3. لما بيبقي عندك ميعاد مع مدير شركتك أو دكتور مشروعك او اي حد مهم ممكن تسيبه وتسرح؟
4. مش بتقعد تحاول تفهك كل كلمة بيقولها عشان تبيّن له انك متفوق؟ ويمكن يكون بيلمحلك بكافلة او ترقية؟؟
5. بتجهز بقي لليمعاد ده قبلها بقد ايه؟ وبتبقي محضر كلامك ومفضي ذهنك كده صح؟
6. صلاتك بقي الدنيا بتشغل كام في المئة منها؟ (بأمانة)
7. ولو بتاخد نسبة كبيرة هل بتاخدها بسهولة؟ ولا بتبقي بتجاهد نفسك وبتبذل مجهود عشان تركز في وقت ملك الملوك اللي مخصصه لك بيوميا ؟


اترك لك الإجابة والقرار ولكن للتذكرة
قَدْ أَفْلَحَ الْمُؤْمِنُونَ ﴿1﴾ الَّذِينَ هُمْ فِي صَلَاتِهِمْ خَاشِعُونَ﴿2﴾ 
(سورة المؤمنون)

لحظة مواجهة 4

1. كام مرة بقيت بتتمني امتي الجنة تيجي بقي؟
2. كام مرة قعدت تتكلم مع ربنا كده في كل حاجة في حياتك واللي جواك؟
3. طب بتعمل كده امتي؟ لما بتكوت متضايق بس وفي وقت ابتلاء؟ ولا متعود علي كده في العسر و اليسر؟
4. طب لما بتدعيه بتدعيه بالعربية والزواج وتيسير الحال بس؟ ولا كمان بتدعيه يقربك منه؟
5. من الآخر كده بتفتكر ربنا امتي؟؟ في العسر فقط ولا في العسر واليسر؟


اترك لك الإجابة والقرار ولكن للتذكرة


" وَإِذَا مَسَّ الْإِنْسَانَ ضُرٌّ دَعَا رَبَّهُ مُنِيبًا إِلَيْهِ ثُمَّ إِذَا خَوَّلَهُ نِعْمَةً مِنْهُ نَسِيَ مَا كَانَ يَدْعُو إِلَيْهِ مِنْ قَبْلُ وَجَعَلَ لِلَّهِ أَنْدَادًا لِيُضِلَّ عَنْ سَبِيلِهِ" (الزمر 8 )