نضارتك لونها ايه ؟

عارف لما تقتنع بحاجة وتبدأ تشوف كل حاجة حواليك بتأكدلك علي الحاجة دي؟

زي مثلا ان مديرك بيكرهك فتبدأ تسمع كل كلمة بشكل مختلف ، تبدأ تلاحظ انه بيبتسم مثلا لزميلك اكتر في وسط كلامه اكتر ما بيبتسملك ، وكل فتفوتة بعد كده هيعملها زي مثلا انه ميصبحش عليك في يوم فده له علاقة بيك وعشان بيكرهك واحساسك كان في محله.

أو مثلا واحدة طول الوقت حاسة بعدم أمان ان جوزها هيسبها فتبدأ تشوف انه لو في يوم جه متضايق من الشغل انه متضايق منها هي وتاخد الموضوع عليها وتقول اكييد ضايقته فحاجة وهيسبني وتبدأ بقي تتعامل معاه علي هذا الأساس فتخنقه في وقت هو مخنوق فيه اصلا مش منها. أو مثلا نسي يجيب لها حاجة هي طلبتها منه فيبدأ يدور في دماغها أه ماهو خلاص مبقاش بيهتم بيا مبقاش بيحبني وهسيبني.

ال scenarios  دي تظهر انها مبالغة شوية ؟ الحقيقة انهم واقعيين جدا وفي ناس عايشة كده ، وكل واحد فينا عنده حاجة بيحصله فيها confirmation bias  من كتر ما هو مقتنع بيها القناعة دي بقيت filter  بيعمل عملية ترشيح لكل حاجة بتحصل بحيث ميعديش أي حاجة غير اللي بتأكد علي القناعة دي ، نضارة بنشوف من خلالها بس النضارة دي بتعدي لون واحد بس ومبتسبش فرصة لباقي الألوان انها تعدي فمش بنشوف الحقيقة كاملة .

لو بتعمل كده مع قناعة مضرة فانت بتعذب نفسك طول الوقت، زي ما يكون طول ما انت ماشي في حاجة جوا بتدور علي ايه بقي اللي هيعكنن عليك دلوقتي ؟ ايه اللي هيثبت لي ان نظريتي صح ؟

الحل؟ متغمضش عينيك عن اللي بيحصل ، لو الموقف مرتبط بشخص اسأله وخلي التساؤل بتاعك فارض حسن الظن مش داخل تغلّطه وافهم هو ليه عمل كده وحالته كانت ساعتها ايه وبيفكر فإيه ، ولو مكنش في أي ظروف وصل له ان الفعل ده حسسك بكذا كذا وضايقك وقوله تحب ازاي يبقي التصرف المرة الجاية.

أما لو الموقف مش مرتبط بحد زي مثلا انك مقتنع انك فاشل فبتشوف فكل فتفوتة متعرفش تعملها انك فاشل وتأكدلك الشعور والقناعة دي ، لو الموقف كده،  الحاجة االلي تكسر الموقف ده ، دور علي حاجة بتعرف تعملها واعرف ان ده معناه مش "انت فاشل" معناه انك بس معرفتش تعمل الحاجة دي دور أو مثلا علي حد انت شايف انه مش فاشل وبرضوا معرفش يعمل الفعل ده أو مثلا دور علي الاسباب اللي خلتك فعلا مقدرتش تعمله ، أو فكر بطريقة مختلفة بأنك دلوقتي عارف متعملش ايه وايه اللي محتاج تعمله فعلا عشان تعرف تعمل الحاجة دي المرة الجاية.

ركز دايما النضارة اللي لابسها لونها ايه ؟ لونها اسود فمضيعة عليك ألوان كتير ولا لون فاتح فمش مضر أوي بس بيغير الحقايق ؟ ولا زجاج شفاف شايف الحاجات من وراه بموضوعية.

نفسك جزء منك ، متعذبهاش عاملها بالحسني عشان في الاخر هي ورا كل حاجة ، ورا حالتك المزاجية ، ادائك، افعالك . لوماشي تعذبها طول الوقت فمتوقع ايه الناتج ؟

تأثيرك في طفلك

الأطفال عجينة بتتشكل عن طريقنا, كلامنا افعالنا تعبيراتنا اللي
كلهم بيعبروا احنا بنفكر ازاي.

قابلت طفل المفروض بيتعلم يعمل لعبة, من أول ما شافها قال
"دي هاتفشل" وخلي بالك انه مقالش "صعبة" او 
"مش هاعرف" لأ "هتفشل!"

مر الوقت وهو كل شوية وهو شغال يكرر الجملة انه شايف
انها هاتفشل وده كان بيأثر عليها انه كان بيقلل محاولاته في عملها
وبيسبها وفعلا اتأخر عن باقي الأطفال في عملها.

انا اصريت اني اقعد جنبه اخليها يرجع يكملها ولما خلصت قلتله ايه بقي
اللي حصل؟؟؟ ورد بمنتهي التلقائية "مفشلتش".

قعدت معاه قلتله بعد كله لما تبدأ حاجه هاتقول ايه رد برضه بتلقائية
"مش هاتفشل"!!!!! (الولد معندوش كلمة "نجاح" الحاجه عنده يا بتفشل 
يا مبتفشلش)

قلتله ايوه ماشي مش هاتفشل أمال ايه هايحصل لها؟؟؟؟ قالي
بمنتهي التضرر "هاتنجح"

احنا متخيلين ازاي احنا بنأثر علي طريقة تفكير ولادنا من مفرداتنا
ورؤيتنا للأشياء؟؟

مفيش سبب مقنع واحد في الدنيا ان يبقي طفل عنده 6 سنين متشائم
ومنهزم بالطريقة دي!

ادرسوا تربية قبل ما تخلفوا , اقرءوا , راعوا كل كلمة طالعة عشان
 ابنك او بنتك دول روح , شخص هايبقي له أصدقاء هيأثر فيهم وفي
 يوم هايتجوز ويأثر في انسانة تانية وأبناء مش مجرد إنك قاعدة
زهقانة فتقرري تخلفي او انك عايز حد يشيل اسمك, خلي عندك هدف
أسمى متبقاش بتفكر في نفسك وبس.

املي وقتك صح وانتي بتربي وانت خلي عندك احسان واتقان مع اللي
 هايشيل اسمك.

التغيير

التغيير ده عامل زي دكتور الاسنان في اللي بيخاف منه وفي اللي بيكرهه ومستعد يتألم بس ميروحلوش وفي اللي بيروحله عادي جدا.

رغم ان ال 3 انواع عارفيين فوائد مرواحهم له واضرار عدم المرواح.

والتغيير له انواع زي وجع الاسنان كده يا إما الأسنان مزنقه علي بعض فالدكتور بيبرد (بضم الياء) بين الاسنان عشان يوسع لهم وميبقاش في ضغط.

او بتبقي السنه مسوسه فبيحشيها ؛ او السنه متئاكله خالص والعصب تعبان فلازم تتخلع.

اللي بيخاف بقي من التغيير في الغالب بيبقي مر بال 3 حالات اللي الدكتور بيعالج بيهم بس ماسك نفسه ومصر ميروحش عشان بيخاف او مبيحبش وفي الاخر بيضطر يروح لما الألم يبقي لا يطاق ويضطر يخلع بدل ماكان ممكن يحشي .

التغيير مش حاجه ممكن تمسكها في ايدك ولا تشيلها في كييس ، التغيير حاجه هاتحسها وتلاحظها علي اسس انت بتحددها واللي هاتحسه تجاه التغيير ده معتمد علي المعاني والاعتقادات ورؤيتك للتغيير ده.

زي عند دكتور الاسنان تشوف ادواته شكلها مرعب ومؤلم فتحس بالألم مضاعف او تركز علي الفايدة اللي بتحصلك فتحس بالألم الطبيعي المحتمل.

عشان تحدد بقي تغييرك ده شكله ايه محتاج تقرر امتي وفين وازاي هاتعمل التغيير ده،  وانك تتقبل ان في بعض الحاجات هاتبقي لسه مش واضحه خلال التغيير ده وعشان تقدر تحكمها تبقي دايما مراقب خطواتك وبتعمل عمليه feedback  مستمرة عشان تعرف ايه نافعك وايه ممكن يتحسن.

محتاج يبقي عندك الدافع الكافي سواء كان هدف عايز توصله او الم محتاج تتخلص منه، وعشان تحدد اول خطوة تبدأ بيها محتاج تعرف وضعك الراهن بالنسبة للي التغيير اللي عايزه ويبقي عندك الشخص اللي بيشجعك علي الخطوة دي وبيؤيدك فيها.

وده وصف التغيير الصحي اللي ممكن يحصلك عن طريق ال coaching