لحظات مواجهة "لحظة مواجهة 1"

لحظات مواجهة هاتكون سلسلة من الأسئلة اللي تواجه بيها نفسك من وقت إلي الأخر عشان نشوف نفسنا ماشين صح ولا محتاجين نصلح حاجات فينا , عشان نكون اقرب  الي الله واسعد في الدنيا وفي أخر اللحظة القرار والحل ليك لوحدك فكر وقرر هاتصلح ده ازاي؟ .... ولنبدأ بأول لحظة
         -----------------------------------
1. حافظ كام اغنية؟
2.  كام أغنية تعرف تميزها من أول 3 ثواني فيها؟
3. طب محتاج كام كلمة عشان تتعرف علي أغنية؟
4. كام أغنية عارف قصتها ايه (video clip) ؟
5. كام أغنية فاهم هي عايزة ايه؟


تعرف تستبدل كل كلمة "أغنية" في الأسئلة السابقة ب"سورة من القرءان" وتجاوب عليهم تاني؟
قارن إجاباتك وسأترك لك القرار ولكن اذكرك
"وَقَالَ الرَّسُولُ يَا رَبِّ إِنَّ قَوْمِي اتَّخَذُوا هَٰذَا الْقُرْآنَ مَهْجُورًا" (الفرقان 30)

خواطر إيمانية "الُمُنعِم"

لو  بصيت حواليك اكيد هتلاقي واحد دايما مش راضي دايما متذمر وحاسس إن كل حاجة حواليه بايظة وإن ناقصه حاجة, ولو كنت صادق مع نفسك هتلاقي انك اوقات كتير بتبقي كده لعدم فهمك تدبير ربنا واسباب حدوث بعض الأشياء بس من رحمة ربنا عز وجل بينا والدليل انه بجد عايز يعلمنا مش يعذبنا انه بيقول لنا المفروض نعمل ايه عشان نعرف نطلع من الموقف ده.

لو وقفنا لحظة أمام آيتين وهما "وَقَلِيلٌ مِّنْ عِبَادِيَ الشَّكُورُ" و "وَإِن تَعُدُّواْ نِعْمَةَ اللّهِ لاَ تُحْصُوهَا" وخلينا نبدأ بالأية الثانية

"وَإِن تَعُدُّواْ نِعْمَةَ اللّهِ لاَ تُحْصُوهَا"  لو جبت طفل في ابتدائي وحطيت قدامه تفاحة وقلتله عدها؟ هايقولك مابتتعدش دي مفردة هي واحدة هاعدها ازاي!

يبقي ربنا لما يقلك عد النعمة وكمان بيقولك انك مش هاتقدر تحصي عددها يبقي هي اكيد النعمة مش مفردة, طب ازاي؟ ...امسك نعمة واحدة كده اي نعمة صغيرة كانت او كبيرة واقعد "فصصها" هتلاقي وراها عدد لا نهائي من النعم المستورة فيها وجائت هذه الأية مرتين في القرءان مرة "وإن تعدوا نعمة الله لا تحصوها إن الله لغفور رحيم" ومرة اخري " وإن تعدوا نعمة الله لا تحصوها إن الإنسان لظلوم كفار" وده نوضيح من ربنا عز وجل لينا انه متمم نعمته علينا رغم ذنوبنا برحمته وغفرانه وبرغم عدم شكرنا لهذه النعم وهنا نيجي الي الأية الأخري

"وَقَلِيلٌ مِّنْ عِبَادِيَ الشَّكُورُ": لو حاولنا نعد بقي كل النعم اللي احنا فيها هتلاقي انها عدد لانهائي ونِعم مستورة وراء نِعم   بس احنا اللي بنمسك في اللي ناقصنا وفاكرينه هيكون هو ده خلاص اقصي سعادة هنوصلها ومش هانحتاج حاجة بعده بس برضه لما يجي بعد مده مش هايعجبك.. اقرأ كن شكورا

الخلاصة انك غرقان في نعمه بس نفسك البشرية والشيطان مانعينك من انك تشعر اسم "المنعم"

افساد شعب"مع سبق الإصرار "

بما ان رمضان السنة دي الممثليين جعلوه  شهر المسلسلات الفاجرة اللي كل الممثلين بيتفننوا انهم يطلعوا كل مواهبهم في الشهر ده بالذات بعيدا عن أي شهر فأحب ان انقد مسلسل واحد تابعته (للأسف ) لأني انخدعت فيه.

يمكن من اكتر المسلسلات اللي اشتهرت أوي هو "مع سبق الإصرار "  ايه اللي خلاني اتابعه؟ هو اني حسيت ان شكل المسلسل ده فيه عظه في الأخر وهايعلم الناس درس ولكن طلع ان هيهات ان الواحد يطلع بدرس مستفاد من وسط زي ده (وطبعا لا اقصد كل الوسط الفني لأني احترم اعمال ممثليين اخريين )

القصة باختصار انها كانت محامية مشهورة وشاطرة جدا وعمرها ما بتخسر قضية لكن! كانت تدافع عن أي شخص حتي لوا انها متأكده انه هو الجاني وليس المجني عليه! وفجأة بدأت حياتها تتلخبط ويحصل لها مصائب في حياتها من قتل زوجها وابن من ابنائها يدمن ثم تتزوج بنتها عرفي ثم يتوفي ابنها الصغير , انا بقي هنا انخدعت وقلت واضح ان المؤلف عايز يوصل رسالة وانها هاتتعظ وهاتتقي ربنا في تصرفاتها بعد ذلك ولكن!

ولكنها اكتشفت ان جوزها اللي اتجوزته بعد وفاة جوزها الأولاني هو السبب في كل ده ! من طقطق لسلام عليكم ! فقررت الانتقام!! واتفرج بقي علي جميع سبل الانتقام التي اتخذتها من تلبيس صاحبتها لقضية دعارة ومن سرقة ورشاوي وبلطجة ووصلت انها قتلت شخصية في المسلسل بنفسها ولبستها في جوزها الجديد !

انتقادي بقي هو ربنا حلل الظلم عشان تنتقمي ؟ ده اذا كان حلل الانتقام أصلا ،واللي ينرفز ان هي كان عندها ما يكفي من الأدلة اللي تجيب للراجل ده الإعدام لكن هي قررت تنتقم وده اتقال علي لسانها في المسلسل !

عزيزي المؤلف لقد افسدت الكثير من العقليات , فلقد زرعت فيهم انك تنتقم وتظلم ده هايشفي غليلك وهايريحك وأنت كده ربنا مش هايحاسبك ومش حرام اللي بتعلمه عشان انت بتنتقم لنفسك !

عزيز المؤلف لقدت افسدت شعب مع سبق الإصرار وحسبي الله ونعم الوكيل !!

اختبارك

بعض المواقف في حياتنا  كبيــــرة أوي بس بعد ما بتعدي بنقول هو ازاي انا طلعت من الموقف ده أو ازاي الموقف ده مر عليا في حياتي ده كان صعب أوي انا فاكر تعبه بس مش مضايق دلوقتي هو انا ازاي طلعت من الأزمة دي؟

اللي بيخليك مش متخيل انت ايه اللي طلعك من الموقف ده ومش حاسس بالتعب اللي كنت فيه ساعتها وانت بتحكيه مثلا انك بتكون اتعلمت منه حاجة, بقيت أقوي ، تقدر تقول الدنيا مرمطتك فقويت.

الفرق من شخص لشخص ان في واحد بيضخم الابتلاء ويقعد "يولول" علي اللي هو فيه وان في واحد بيقعد يفكر كده بهدوء اللي أنا فيه ده المفروض اطلع منه بإيه ؟ ربنا عايز يوصلني لإيه؟

كام مرة أول ماعرفت الدرس اللي المفروض تتعلمه من الظروف اللي انت فيها الابتلاء رفع عنك؟ أو تأثير الابتلاء بدأ يتلاشي؟

الفكرة اللي بتخلي الابتلاء ينتهي  أن  تدرك سببه,  لو كل واحد فينا بص للابتلاء علي انه تنقية وارتقاء لنفسه لهانت عليه أمور كثيـــرة

كل ما تمر بأزمة أو حتي موضوع خانقك دور علي ربنا عايز يعلمك منه ايه وأول ما تلاقيه هتلاقي الدنيا بقت اسهل وهاتحس انك زي ماتكون اتغسلت من جوه كده وهو ده فعلا اللي بيحصل لإن الابتلاء انما ينقيك ويرتقي بك من الدنيوية ليجهزك لدخول الجنة وخليك فاكر كويس أوي ان ربنا مابيكلفكش ولا بيحطك في ظروف انت ماتقدرش عليها ،هو أعلم بك منك هو عالم انت تقدر تستحمل ايه وماتقدرش تستحمل ايه فكل ما الابتلاء يكبر ثق في نفسك وقول مادام كاتبلي كده يبقي انا اقدر عليه ،واصبر فالابتلاءات انما هي اختبارك في الحياة اختبارك الذي يؤهلك للرجوع لبيتك ، للرجوع لما خلقت له في الأساس ، للرجوع للجنة =)

بطاريتك

لما تعدي عليك فترة كده حاسس انك بعييد اوي ومش حاسس بطعم الصلاة كده ولا مديها قدرها وخشوعها ولا حتي الدعاء حاسس بيه في قلبك بتقوله بلسانك بس قلبك مش بيخفق مع كل حرف في الدعاء لأنك بتعنيه بجد.

الحالة دي حالة عادية جدا لأن انت كإنسان حياتك كلها ups and downs شوية بتبقي مبسوط وشوية متضايق، شوية ايمانك في قوة الجبال وشوية ايمانك ضعف شوية المهم في الفترة دي انك ما تغفلش!! المهم في الفترة دي انك ماتسبش لجام نفسك، لأنك لو سبت نفسك لنفسها كده وغفلت قد تعتاد نفسك علي هذا الوضع وتستلذ المعاصي وترتاح للبعد.

عارف لما تبقي مناعتك ضعيفه فتقوم لاقط برد؟ اهو ده النفس الكلام فترة ضعف ايمانك وبعدك دي بتبقي اكتر عرضه لارتكاب معاصي اكتر والمقصود بكلمة المعاصي دي مش فواحش بس لأ دي شاملة من اكبر ذنب لأكبر ذنب (اه انا كاتبة الاتنين اكبر لأن مفيش حاجة اسمها ذنب صغير وذنب كبير الفكرة انت بتذنب في حق مين ايا كان حجم الذنب) . 

الرسول صل الله عليه وسلم قال (جددوا ايمانكم بلا اله الا الله) معني ذلك انك محتاج من فترة للتانية تشحن بطارية ايمانك اشحنها بذكر الله وترديد لا اله الا الله، اشحنها بعمل صالح صغير( صغير في نظرك لكنه كبير عند الله عز وجل )، اشحنها بدعائك لله انه يردك اليه ردا جميلا حتي لو قلبك مش بيهتز وانت بتدعي داوم عليه عشان اصرارك علي الدعاء يخلي الله عز وجل مقلب القلوب يرجع قلبك للإيمان. 

الحمد لله =))

كُن شكوراً

في اوقات كتيــرة أوي بتعدي علي الواحد بيحس ان مفيش حاجة في حياته ماشية صح , وان كل حاجة بيعملها بتبوء بالفشل إن مكنش الفشل المريع, والدنيا بتضلم في وشه.

الحاجة الفاصلة في الموقف ده حاجة من اتنين يا إما ان اللي عاوزه يحصل ( وده مش صح تعتمد عليه وهانشوف ليه) يا إما انك تدرك ما أنت فيه وأسبابه فتستطيع أن تمر من هذه الأزمة.

طب ليه مش صح نعتمد  علي ان الحاجة اللي عاوزنها لازم تحصل عشان أتبسط؟ عشان بمنتهي البساطة انت شايف ال small picture ومُصر إنك تشارك ربنا وعز وجل الوحيد اللي شايف ال big picture  في تحديد أمور ومسار حياتك, اعمل ما عليك وادعي بيقين وانتظر ما سيُحدِثهُ الله لك وتقبل أي شئ فلا يحدث شي إلا برضا الله عز وجل.

أما إدراك ما أنت فيه فما هو إلا ادراكك لما انت فيه من نعم ، بُص علي طفل لسه مولود شوف قاعد ازاي؟ أو لأ هو نايم ازاي؟ مش قادر يقعد اصلا لأن ضهره لسه مش ماسك نفسه! شوف ازاي أي حاجة عاوزها بيبكي عشان يلفت انتباه اي حد يعملها له لأن لا حول له ولا قوة! لأ وشوف فأول 40 يوم ده مبيبقاش شايف غير أطياف أصلاً! 

ودلوقتي بُص لنفسك بقي وانت واقف علي رجليك بتمشي وتتحرك وتجري ! قادر اننك تقوم تخدم نفسك! قادر انك ماتطلبش مساعدة من حد إلا لو حاجة استعصت معاك لكن مش في كل حاجة, قادر انك تقوم تأكل نفسك, تقضي حاجة نفسك , تتكلم وتعبر عن نفسك.

تخيل ان حاجة من دول فقدتها دلوقتي ورجعت زي الطفل الرضيع اقعد تخيل نفسك كده فاقد حاجة من دول (واكيــد في حاجات كتير انا مذكرتهاش) وساعتها هاتحس بحاجة واحدة بس

"قد ايـــــــــــــــــــــــــــــه انا جاحد بنعمة ربنا عز وجل عليا" "قد ايــــــــــه انا عايش بنعمته وجسمي شغال بأمره في كل نفس وأنا برضه مش مرضي! "

اعرف ان سبب اكتئابك اللي ظاهرياً لك بدون سبب انما سببه الوحيد هو الشيطان اللي بيحاول يغمي عنيك عن اللي انت فيه.

وإن كان اكتئابك بسبب فتعلم الرضا بإنك تدور علي نعم تانية من نعم ربنا عليك وأنت ساعتها هاتبتسم من قلبك =) 

جدد إيمانك

ساعات الواحد بيحتاج لحاجة تجدد ايمانه وتنشطه كده وتخليه يحس بنعمة ربنا عز وجل عليه
أكتر ناس تجدد ايمانك اللي بيبقوا لسه داخلين في الدين جديد عشان بيبقوا حاسين بالمعاني اوي عشان كده دخلوه, حاسين أوي بمعاني احنا من كتر ما اتعودنا عليها ممابقيناش عرفينها او نسيناها! بتشوفهم قد ايه متحمسين وقد ايه حابين الدين ده وحاسين بقيمته عشان هما شافوا الضلال وجربوه ودي نعمة من ربنا علينا انه كتب لنا من اول يوم اننا مسلمين فلم نذق مرار الشرك أو الكفر والضلال (الحمد لله)
بدأت القصة لما اتعملي invite  عادي علي  event تبع زدني واحد اسمه "يوسف استس" مين ده؟ عملت اني رايحة وقلت لما اشوف هاعمل ايه, المهم قرأت عنه تشجعت أكتر ده كان قسيس واسلم.
ذهبت وفوجئت بالعدد الرهيب لقيت مكان بالعافية ! وفتحوا قاعة تانية ما شاء الله , ساعة صلاة العشاء كانت قعلا كأنها صلاة جمعة واكتر قلت في نفسي " هو الرجل ده ايه عشان الناس دي كلها تيجي عشان تحضرله " مع العلم اننا وقت امتحانات!
أول ما دخل رجل ضحوك جدا بيضحك ضحكة صافية أوي من قلبه!
كان كل كلامه عن معني كلمة "إسلام" وكان تذكير جميل جدا لكل واحد مسلم تذكير بيعني ايه تسلم ل الله عز وجل ازاي تتوكل عليه ازاي تقدم نفسك له كاملا بدون مقاومة بدون فلترة لأوامره مش هاسمع كلامه في اللي يعجبني ومسمعش اللي مايعجبنيش.
اكتر حاجة أثرت فيّ انه بيقرأ القرءان بصعوبة جداااا الحروف طالعه منه بصعوبه وفي حروف مابتطلعش أصلا! ساعتها حسيت أوي بعظمة القرءان الكريم! حسيت بجمال معانيه وعمقها اللي عمرك ماهتحسه وانت بتقرأه بأي لغة تانية عشان هو إعجاز عشان اصلا هي دي المعجزة اللي فيه معانيه وجماله.
حسيت ازاي واحد مش بيعرف ينطق نص الحروف ومُصر انه يحفظه! حسيت بالخجل اني مش حافظاه!
ماخرجت به هو تجديد إيماني ونية لحفظ القرءان الكريم كاملاً ان شاء الله.
وفي اخر اليوم (ولقد فاتتني هذه اللحظة لأسف ) اسلم احد الحضور بفضل الله تعالي واعلن اسلامه امام الجميع وقد كانت لحظة تدمع لها عينيك فرحا رغم انك مش مستفيد حاجة! بس سبحان الله حاسس ان واحد امامك في لحظة بقي معندوش ولا غلطة ولا سيئة في صحيفته واصبحت كل صحيفته حسنات لقد كان أنقي شخص في المكان!
http://www.youtube.com/watch?v=Xl72C0W5AAc&feature=share
اللهم اجعل لي عملا كعمله وثوابا كثوابه
اللهم اهدني واهد بي =')
وكما قال رسول الله صل الله عليه وسلم " جددوا إيمانكم بلا إله إلا الله"