قالك دولة مسلمة!

 دولة مسلمة بس كل أفلامنا وأغانينا عُري!

دولة مسلمة بس أي مول تدخله لازم تكون صورة الموديل اللي متعلقة لابسة لبس منحرف وفي وضع اكثر انحرافا!

دولة مسلمة وتلاقي محلات الملابس الداخلية عارضة منتجاتها في صور في الفاترينا متناسيين إن قبل ما تكون جسد المرأة عورة علي الرجل فعورة المرأة علي المرأة من السُرة الي الركبة!

دولة مسلمة بس الراقصات بيكسبوا فيها اكتر من اي حد!

دولة مسلمة بس ان راقصة ترقص علي اغنية بتقول "الحسن والحسين" عادي!

دولة مسلمة بس بنرشي وبنرتشى عادي!

دولة مسلمة بس المحجبة مبتلاقيش لبس "شيك" يناسبها في 90% من المحلات

مابقولش نحجر علي حرية حد بس افتكر ان "انت حر مالم تضر" وانت بتضر ناس كتير!

مصر دولة مسلمة اسماً ولا أجد ديناً أُنسب له أفعالها

لحظة مواجهة 2

1. النفس المؤمنة لا تعرف الاكتئاب
2. أمر المؤمن كله خير
3. " وَاصْبِرْ لِحُكْمِ رَبِّكَ فَإِنَّكَ بِأَعْيُنِنَا"


آيات وأحاديث ومقولات تخليك تتكسف من نفسك , عاوز ايه اكتر من ان ربنا معاك كل كسر من الثانية من قبل ما تنفخ فيك الروح في رحم امك الي ان تقابله؟
شعور بالأمان!
لو نفسنا مؤمنة بجد مكناش شلنا هم حاجة ولا قلقنا علي حاجة كنا هانخطط وناخد بالأسباب ومانستناش النتيجة اصلها رزق من عند الله سبحانه وتعالي , اشهر جملة بنقولها "عملنا اللي علينا والباقي علي ربنا" لكن بنقولها بالسان بس! مش مؤمنين بيها من قلبنا!
لو مؤمنين بجد وعارفين إن ربنا مابيضيعش مجهود حد ماكناش اتضايقنا لما النتيجة مجتش زي ماكنا عايزين , يمكن ماجتش زي ماحنا عايزينها تيجي في الدنيا بس اللي لازم نؤمن بيه ان اكيد هاتيجي فالآخرة زي ماحنا عايزينها واكتر بكتيـــــر , اكتر حتي ما تخيلنا يقدر يجيب أصل اللي بيرزقك وانت عاصيه ويبعتلك رسايل لردك اليه طول ما انت بعيد عنه ومعرض عنه اكيــــد مش هايظلمك , الرحمة دي مايجيش من وراها غير العدل وانك تاخد ثواب كل ماتعبت من اجله في الدنيا ولم تري نتيجته او جاءت اقل مما تستحق.

لحظات مواجهة "لحظة مواجهة 1"

لحظات مواجهة هاتكون سلسلة من الأسئلة اللي تواجه بيها نفسك من وقت إلي الأخر عشان نشوف نفسنا ماشين صح ولا محتاجين نصلح حاجات فينا , عشان نكون اقرب  الي الله واسعد في الدنيا وفي أخر اللحظة القرار والحل ليك لوحدك فكر وقرر هاتصلح ده ازاي؟ .... ولنبدأ بأول لحظة
         -----------------------------------
1. حافظ كام اغنية؟
2.  كام أغنية تعرف تميزها من أول 3 ثواني فيها؟
3. طب محتاج كام كلمة عشان تتعرف علي أغنية؟
4. كام أغنية عارف قصتها ايه (video clip) ؟
5. كام أغنية فاهم هي عايزة ايه؟


تعرف تستبدل كل كلمة "أغنية" في الأسئلة السابقة ب"سورة من القرءان" وتجاوب عليهم تاني؟
قارن إجاباتك وسأترك لك القرار ولكن اذكرك
"وَقَالَ الرَّسُولُ يَا رَبِّ إِنَّ قَوْمِي اتَّخَذُوا هَٰذَا الْقُرْآنَ مَهْجُورًا" (الفرقان 30)