معنى النجاح "بتعجّز نفسك ولا بتشجعها ؟"

لو سألت نفسك النجاح معناه ايه بالنسبة لي ؟ بتكون ايه أول اجابة؟...

بعض الناس بتقول لما اوصل للي أنا عايزه بالظبط , بالحنتوفة مقلتش سنتيمتر وتطلع احسن حاجة

وبعضهم بيقول لما أبدأ اشوف علامات انا حاطتها لنفسي

وفي البعض بيقول لما اللى حواليا يثنوا علي اللي عملتوا

وفي اللي النجاح بالنسبة له انه يشوف حاجة متحققة قدامه , تحقق يقدر يشوفه بعينه

مش حاجة  تظهر علي المدي الطويل

لو تخيلنا كل واحد من دول بيعيش حياته ازاي , شايف مجهوده ووقته بيروحوا هدر وبييأسوا

ولا بيبقوا مليانيين حماس وقوة وارادة انهم يكملوا؟

نظرتهم ايه لنفسهم؟ achievers  ولا losers

اللي النجاح بالنسبة له انه يوصل لحاجة وميقلش عنها سنتيمتر ده  وتطلع أحسن حاجة ده عمره ما بيرضي عن اللي عمله في الغالب حتي لو كل الناس اقسموا ان دي احسن حاجة في الدنيا هو دايما شايف ان في احسن، ده من الاخر بيعجز نفسه لان عمره ما هايحس باللإنجاز.

واللي بيقول النجاح ان اللي حواليا يقولوا اني وصلت ويثنوا علي اللي عملته ده رابط نفسه بأشخاص وكل واحد فيهم له نظرة للأمور وخبرات وتجارب وظروف بيمر بيها, ومن المؤكد انهم غير نظرتك وخبراتك وتجاربك وظروفك فمتربطش نفسك بحد عشان ببساطة في اشخاص متشائمة مثلا في اشخاص تانيين بيعملوا من الحبة قبة ، في اشخاص بيحبوا يجملوا الحقيقة عشان ميزعلوش اللي قدامهم او يضغطوا عليه عشان مقتنعين ان ده هيطلع حاجة احسن منه رغم ان ده في الواقع بيحبطه وبيستنفذ

قواه. أنت اللي عارف بالظبط عايز توصل للإيه، انت الخبير بأمورك واهدافك متعتمدش علي حد غير وتبقي طالب منه أمور واضحة وصريحة وتبقي تتقاس عشان ميبقاش بيقولك رأيه الشخصي.

أما اللي بالنسبة له انه انجز حاجة او نجح فيها انه بس يشوفه قدامه ده هيبقي طول الطريق محبط عشان مش شايف أي علامات ، ولو الناتج هيجي متأخر شوية حماسة هايختفي وطول الوقت اللي مستني فيه النتيجة هايبقي كأنه رمي مجهوده في الأرض.

نركز بقي ربنا عز وجل لما قالها قالها ازاي

"(39) وَأَن لَّيْسَ لِلإِنسَانِ إِلاَّ مَا سَعَى (40) وَأَنَّ سَعْيَهُ سَوْفَ يُرَى (41) ثُمَّ يُجْزَاهُ الْجَزَاء الأَوْفَى  " سورة النجم

ببساطة مش كل حاجة في الدنيا هتعملها لازم تبقي هاتشوف نتيجتها ايه ولا لازم تشوف نجاحها،انت نجاحك انت انك حاولت وسعيت وقابلتك عقبات تخطيت بعضها ووقعت في بعضها

نجاحك انك ميأستتش واستسلمت ، جاهدت نفسك والظروف وعملت كل اللي في قوتك

وهو ده اللي ربنا هايحاسبك عليه.

تخيل لو عشت بالنظرة دي هتحس بإيه لما تعمل حاجة ومتبقاش لسه شايف نتيجتها النهائية ؟

هيبقي عندك قوة وحماس انك تكمل فيها وأنك تبدأ في حاجة بعدها متبقاش مستنفذ، يبقي عندك ثقة ان سواء الحاجة دي حققت مرادها أو لأ فانت مأجور وربنا هايكرمك

هتبقي متوكل حق التوكل ..  

اختار معتقداتك

في حياتنا بضع المقولات اللي بنستخدمها من غير ما نفكر هي جت منين ، هي هاتفيدنا ولا لأ ، ولو اقتنعت وآمنت بيها دي هيفدني ولا هيضرني ، هيحسن من ال quality  بتاعت حياتي ولا لأ.

عندك مثلا ان "الراجل لو جاب لمراته هدية فجأة أو قالها كلام حلو وهي مش متعودة منه علي كده يبقي اكييييد اكيييييد بيخونها" !!!!!!!!!!!!!!! طب ليه ؟ و ازاي وميين قال كده ؟

يعني عشان واحد ولا اتنين ولا 100 طلع ده كان الدافع بتاعهم ان كل الرجالة اللي في الدنيا كده ؟ قابلتوهم كلهم خلاص؟ واحد واحد ؟؟

اصلا لو كل واحدة اقتنعت بالكلام ده طبيعي جدا ان يبقي رد فعلها مش سعادة وانبساط باللي عمله او جابه فطبيعي جدا ان الرجل هيعتبر ان ده feedback  مش ايجابي علي اللي عمله فمش هيتعب نفسه ويعمله تاني، فهنوصله للنتيجة اللي احنا متوقعنها بأفعالنا ونقوم قايلين اهو الكلام اتحقق! ما انتي اللي اقتنعتني بحاجة واتعاملتي علي اساسها فطبيعي نوصل للنتيجة دي!

الحاجات التانية برضه الظريفة أوي "انك لو عملت الحاجة بعد ما أنا قلتلك عليها فبقي ملهاش معني" ، أهو كده بقي احنا عجزنا الرجل تماما! ومع المقولة اللي قبلها بقيت المعادلة الصعبة، ووصفة التعاسة.

يعني يعمل من نفسه مش عاجب ، يعمل عشان قالت برضه مش عاجب فحضرتك هاتتبسطي امتي بقي ؟ ها امتي؟ ماهو لو في حاجة اخترعوها تخلي الناس تقدر تدخل جوه دماغك وتفهم وتشوف انتي بتفكري في ايه وبتتمني ايه واحتياجاتك ايه مكنش حد غلب!

"فاقد الشئ لا يعطيه" جملة لا تمثل اي حاجة غير انها حكمت علي كل بني ادم اتحرم من اي حاجة انه عمره ما يعرف يقدمها، يمكن يكون في ناس فعلا مبتعرفش تقدم حاجات اتحرمت منها بس اللي انا متأكده منه ان اكتر منهم بيعرفوا كويس أوي يقدموا اللي اتحرموا منه وأحسن بكتير لأنهم بيبقوا احسن ناس حاسيين بأهميته ومعني فقدانه فميحبوش حد يفقده زي ما هما فقدوه.

"محدش بياخد كل حاجة ، فارضي بأي عريس انتي عايزة تفصيل ولا ايه" هو ميين قال ان محدش بياخد كل حاجة؟ مش معني ان اللي بيقول الجملة دي انه اختار غلط ان "محدش" بياخد كل حاجة، ممكن نقول محدش كامل حلو جميل متفقين لكن عادي علي فكرة تلاقي حد فيه كل حاجة نفسك فيها وده مش معناه ان مفهوش عيوب لأ فيه عادي هو بني ادم يعني .

كام واحدة سمعت الجملة دي ورضخت لها فبقت تعيسة ونقلت نفس الجملة لأولادها وأولاد أولادها ولكام جييل بعدها! عشان هي اخدت قرار مش صح بتطالب كل اللي حواليها انهم يقللوا من معايير اختيارهم عشان يمشوا علي خريطة حياتها ، مش بقول ان نيتهم وحشة اللي بقيولوا كده هما غالبا مش واعيين بالضرر اللي بيسببوه لأن هي دي التجربة الوحيدة اللي مروا بيها في حياتهم وشكّلت وعيهم ومبصوش حواليهم دوروا علي النماذج الناجحة

قبل ما تآمن بمقولة او تنقلها فكر فيها كويس ، هتفيدك؟ هتخليك بني ادم احسن ؟ هتخلي افكاري ومشاعري معايا ولا ضدي؟ هتعيشني سعيد ولا هتخليني طول عمري تعيس ؟

آمن باللي هايفيدك وانقل اللي هايفيد بس عشان لو كملنا كده هنوصل لجيل ميعرفش يعني ايه سعادة..

انت ولا مشاعرك؟

كام مرة حصل معاك موقف ضايقك وعصبك وفضلت متضايق يومين بسببه مثلا؟ او حتي يوم واحد او حتي ضيعت عليه ساعتين مثلا؟

امبارح حصللي موقف وكنت علي وشك اني اضيع يومي عليه ومناسبة سعيدة بسببه لولا ان حصلي awareness  كده وعرفت اتصرف.

اللي حصل اني كنت بستلم فستان من محل وفضلت منتظرة ساعة بعد الميعاد اللي قالولي عليه عشان الاستلام، ولما اتكلمت بمنتهي الهدوء والابتسامة الرد كام "فيها ايه يعني اما تستني ساعة ولا اتنين عشان تاخدي الفستان انتي بس عشان وراكي حاجة فحساها مشكلة"

طبعا انا اي حد يعرفني يبقي متأكد ان الي قالي كده كأنه مضي علي ورقة بيطلب مني فيها اني اقتله ولو حتي ممضاش فانا هقتله برضه :D

لأني طول عمري معروفة بالتزامي في الوقت ومدي اهميته عندي وان فعلا الدقيقة بتفرق معايا وكنت باكل اي حد يتأخر عليا (بس تعافيت الحمد لله وعملت coaching علي ا لموضوع ده وبقيت بدي الناس اعذار وبتقبل لحد كبير جدا لدرجة الناس مبقتش بتصدق لما يتأخروا عليا ويوصلوا يلاقوني مبتسمة :D  "

فإن الست تقولي كده ده فجّر شئ مش قادرة اوصفه جوايا فكرة ان حد يستهين بوقتي وكمان شايف ان ده حقه وان ازاي اعترض انه بيأثر عليا حياتي كانت فتيل اشتعل ومكنش هايطفي

ردي كان " نعم؟!!! وهو العمر بعزقة عشان اجي اقعدلكم هنا ساعة ولا ساعتين؟!! خلاص وقتي فاضي وملوش لازمة للدرجة ما أجي اقعد عنكم كل يوم بقي!! "

ومشيت وانا بغلي فعلا وكان بقالي كتير جداااا متعصبتش كده.

إلي أن! أردكت اني طول الطريق عمالة اضيع كمية مهولة من الطاقة علي اللي حصل وبغلي من جوايا فعلا في طريقي اني اضيع باقي اليوم عليا عشان كلمتين قالوهم.

اول سؤال سألتوا لنفسي هو انا اللي بعمله دلوقتي ؟

ردي كان اني عمالة اكرر الجملة اللي قالوها في دماغي وعمالة اقول "قال ايييه يعني اما اقعد ساعة ولا اتنيين قال فيها ايييه يعني! "

السؤال اللي بعده كان وانا ايه مضايقني في الجملة دي بالظبط ؟

ردي كان " استهانة بوقتي وده شئ مهم جدا بالنسبة لي ويعتبر violation  لوقتي وحقي! وانهم مش بس استهانوا بيه لأ هما أخروني فعلا وضروني"

قولت لنفسي ماشي حقي اني اتضايق واغضب بسبب التأخير اللي كانوا السبب فيه لأنه اعتداء علي حقي ، افتكرت بعدها حاجة مهم جدا ان احنا اي حاجة بنقعد نعيد ونزيد فيها لنفسنا ونعملها سواء فيلم أو صورة أو صوت في دماغنا ونقعد نعيد فيها بتلزق لدرجة انها بتفضل شغالة حتي بعد ما بنبطل نفكر فيها قاصدين بتبقي هي جوانا شغالة خلاص automatic  فبنفضل متعصبين فترة بعد الموقف ولو أي حاجة شبيهة حصلت هانقوم منفجرين.

فقررت مع نفسي اني هبطل اكرر المشهد والجملة دي جوايا واني هتحكم انا بفكر فإيه مش عشان حد معندوش نفس مبادئي وضرني ضرر الي حد ما صغير وخلاص اللي حصل حصل , فمش بسببهم هبوظ يومي ومش هعرف استمتع بالحاجات اللي كانت ورايا بعد كده واتبسط  وان طاقة الغضب الي جوايا دي هطلعها بطريقة احسن وقعدت استغفر ربنا وروحت عملت حاجة بحبها وخلاص!

اللي عملته مش معناه اني متضايقتش ولا اني دوست علي زرار و هييييه انا بقيت حلوة ومبسوطة ، معناه اني فهمت الأول ايه مضايقني بالظبط وقدرت المشاعر دي واحترمتها وبعدين  اتحكمت في افكاري ومشاعري وقررت اني اكون مبسوطة , الغضب شعور طبيعي وصحي الفكرة بنعبر عنه ازاي واحنا اللي بنتحكم فيه ولا هو اللي بيتحكم فينا.

كام مرة فضلت متضايق من موقف كذا يوم ؟

في ايدك تفهم ايه ضايقك بالظبط وتعرف تتصرف صح بعد ما تفهم وتقدر مضايقتك

شريك الحياة

شريك حياة كلمة بنسمعها من ناس كتير نفسهم فيه سواء كانوا بنات او رجال.وقليلين منهم فاهمين اصلا معني الكلمة!

كلمة "شريك حياة" معناها ايه؟ معناها ان حضرتك عندك حياة وعايز حد يشاركك فيها!

وبالحياة دي مش مقصود شغل وبس, الحياة دي يعني عندك شغل وهوايات واصدقاء وأنشطة ورأى وصوت تعرف تعبر بيه عن رأيك ده!

وفي نفس الوقت عندك مكان للشخص ده عشان يشاركك في الحياة دى.

إن حياتك فاضية مش هاتتملى سعادة يوم ما يجى شخص يملاها! عشان بمنتهى البساطة حياتك هاتتمحور حوله\حولها وهتخنق الشخص اللي معاك ويوم ماتتضايقوا من بعض هتبقى اتعس واحد في الدنيا لأن حياتك كلها مضيقاك!

ويوم ما ربنا يرزقك بأطفال اللي هايحصل في الأغلب ان حياتهم برضه فاضية لأنك مش هاتعرف تعلمهم ان حياتهم تبقي ليها معنى ومليئة عشان يوم ما يكبروا في السن وأولادهم يتجوزوا ميحسوش انهم اهدروا حياتهم ومعملوش حاجة لنفسهم , وده اللي انت هاتحس بيه في الاخر!

حب نفسك عشان تقدّرها وتقدر تعمل كل ده! متبقاش مستنى حدي يديلك قيمة, لأ حد تضيفله قيمتك.

وعلي الناحية التانية الشخص اللي معندوش مكان لشريك حياة بس بيتجوز عشان ده المفروض واحتياج الخ , انت اخدته حطيته أنتيكة في البيت عندك مضفتش أي حاجة لحياته طول ما مفيش وقت له!

ابني لنفسك حياة عشانك أنت, مش عشان حد تانى! خليك إضافة للشريك ده مش عبء , خليك قدوة لأولادك وعلمهم إن ربنا محطكش في الدنيا دى عشان تقعد إيدك علي خدك مستنى شريك لحياة ملهاش وجود اصلا!

إفتكر وافتكرى دايما يوم القيامة سؤال واحد بس "عن عمره في أفناه" وتخيل نفسك بترد

"مستنى حد يملى حياتى " .

خلي حياتك لهدف وغاية تعرف تلهم بيها أولادك في يوم من الأيام.

تأثيرك في طفلك

الأطفال عجينة بتتشكل عن طريقنا, كلامنا افعالنا تعبيراتنا اللي
كلهم بيعبروا احنا بنفكر ازاي.

قابلت طفل المفروض بيتعلم يعمل لعبة, من أول ما شافها قال
"دي هاتفشل" وخلي بالك انه مقالش "صعبة" او 
"مش هاعرف" لأ "هتفشل!"

مر الوقت وهو كل شوية وهو شغال يكرر الجملة انه شايف
انها هاتفشل وده كان بيأثر عليها انه كان بيقلل محاولاته في عملها
وبيسبها وفعلا اتأخر عن باقي الأطفال في عملها.

انا اصريت اني اقعد جنبه اخليها يرجع يكملها ولما خلصت قلتله ايه بقي
اللي حصل؟؟؟ ورد بمنتهي التلقائية "مفشلتش".

قعدت معاه قلتله بعد كله لما تبدأ حاجه هاتقول ايه رد برضه بتلقائية
"مش هاتفشل"!!!!! (الولد معندوش كلمة "نجاح" الحاجه عنده يا بتفشل 
يا مبتفشلش)

قلتله ايوه ماشي مش هاتفشل أمال ايه هايحصل لها؟؟؟؟ قالي
بمنتهي التضرر "هاتنجح"

احنا متخيلين ازاي احنا بنأثر علي طريقة تفكير ولادنا من مفرداتنا
ورؤيتنا للأشياء؟؟

مفيش سبب مقنع واحد في الدنيا ان يبقي طفل عنده 6 سنين متشائم
ومنهزم بالطريقة دي!

ادرسوا تربية قبل ما تخلفوا , اقرءوا , راعوا كل كلمة طالعة عشان
 ابنك او بنتك دول روح , شخص هايبقي له أصدقاء هيأثر فيهم وفي
 يوم هايتجوز ويأثر في انسانة تانية وأبناء مش مجرد إنك قاعدة
زهقانة فتقرري تخلفي او انك عايز حد يشيل اسمك, خلي عندك هدف
أسمى متبقاش بتفكر في نفسك وبس.

املي وقتك صح وانتي بتربي وانت خلي عندك احسان واتقان مع اللي
 هايشيل اسمك.