من شبّ علي شئ

حاجات كثيرة بنغفل عنها في حياتنا اليومية و تجاوزات بنسمح بيها بس للأسف الحاجات الصغيرة دي دائــماً بتتراكم و تبدأ في تدمير أو تشويه ما تحاول بنائه علي مر السنين.

أقصد ايه بكلامي؟ هو الموضوع ده ممكن يطبق علي مجالات كثيرة في حياتنا بس دلوقتي هركز علي التربية لأن من وجهة نظري هي اللي هاتصب علي كل حاجة لأن الإنسان هو العامل المحرك لأي مجال أصلا فإن أختل الأصل ضعُف الأساس.

تجاوزات ايه بقي اللي بنسمح بيها عادي دي, ما أهو أصل كل أهل هيقولولك لأ احنا مربين ولادنا أحسن تربية, و أنا معارضتش انتوا فعلا مربينهم أحسن تربية بس بتنفخوا في إربة و تخرموهوا من الناحية التانية بنفسكم .

دلوقتي أنا ربيت ابني علي احترام الكبير و ميصحش ارفع صوتي عليه ولا اتريق علي حد وراء ظهره (ولا من أمامه طبعا) حاو أوي و الطفل بيسمع الكلام و مؤدب انت لحد هنا صح تعالي بقي, بتتفرجوا علي التليفزيون صح ؟ متخفش مش هحرموا ولا همنعكم منه بس كل حاجة لو أسئت استخدمها هاتضرك ولازم كل حاجة تستخدمها تشوف الوجه الآخر لها.

كام واحد فينا اتفرج علي مسرحية "العيال كبرت" , " مدرسة المشاغبين" أو " سُك علي بناتك" ؟

مُلخّصهم ايه؟  سخرية من الأب , من المدرسين, من التقاليد .

أكيد معظمنا اتفرج عليهم و بيموتوا من الضحك  والأطفال يحبوا أوي يضحكوا الكبار و يبسطوهم فبالتالي ايه بيحصل؟ ابنك الطفل الجميل اللي علي خلق يقوم مقلدهم فانت تضحك و تقول شوف الولد قد البلية و بيقلد المسرحية حلو أوي و نضحك, بس خلاص عقله الباطن اتظبط علي ان دي حاجة مضحكة فلما يكبر شوية و تزعق له ان صوته عالي هو عقله الباطن هيقول ايه" هو بيزعقلي ليه؟  مش دي حاجة بتضحك؟ و الناس بتعملها أهوه عادي! اشمعنا أنا؟ هو مبيحبش اني اضحك ولا ايه ؟ " و هيكمل محاولة و كل ما يكبر الموضوع بقي مش هدفه انه يضحكم لا بقي عادة عنده.

و آه بقي لو الأهل أصلا محاولوش يقولوا له كده عيب لما كبر شوية و ضحكوا و قالوا بيهزر!

التليفزيون بيبعت رسائل كثيرة جدا غير ظاهرة و لها تأثير, فمتستغربش ان ابنك بيقول ألفاظ مش كويسة علي البنات, بيسخر منك, بيضرب أخته أو بينظر عادي علي بنات مش لابسه كويس رغم انك معلمه انه يغض البصر! ماهو متنساش ان أنت ايوه أنت اللي كنت قاعد جنبه و في التليفزيون الممثلة مش عارفة لابسة فستان عامل ازاي! و كنت باصص عادي ولا هو حلال لك و حرام عليه!

اتق الله في تربية ابنائك و متبقاش بتهدمها فنفس الوقت اللي بتشقي فيها.

دائما والدي  يقولي جملة كده "من شبّ علي شئ شاب عليه"! أكيد لكل قاعدة شواذ ودول من رحمهم الله و لكن الأساس انه هيتعود عليه من صغره هيبقي معاه طول عمره!

فاتق الله انهم امانة بين ايديك و سلاح  لما يكبروا إما سلاح لك يدافع عنك إلي يوم القيامة أو سلاح في وجهك!