لو لم!

في كثير من الأوقات الواحد بيحس ان مالوش لازمة و انه لا يضيف شئ في الحياة و ان وجوده زي عدمه!و يقعد يتخيل كده " يااه الدنيا كانت هتبقي عاملة ازاي لو مكنتش موجود"!!
قعدت أنا القعدة دي مع نفسي من كام يوم كده بليل و قعدت أحاول أعمل حصر كده كمية الحاجات بققي اللي هتنقص في الدنيا بس كنت متفائلة بزيادة! :D
بس الواقع اني ملقتش حاجة حسيت إن مفيش حاجة في الدنيا معتمدة علي هند و بس! مفيش حاجة بزودها في الدنيا محدش غيري يعرف يزودها, أكيد ربنا خلقتي لسبب خلق "هند" بالذات لسببٍ ما بس أنا مش عرفاه!
قعدت في لحظة لخبطة كده و فجأة جه فبالي أفكر طب أنا كنت هخسر ايه مش الدنيا اللي كانت هتنقص إيه! و هنا بقي فعلا قدرت اعمل حصر لحاجات كتير أوي.
لو مكنش فيه "هند" يعني مكنتش هبقي مُكرَّمة لأن ربنا كَرَّم بني آدم و أنا مكنتش هبقي منهم! مكنتش هاشعر باهتمام ربنا بي و تدبيره لأموري مكنتش هاشعر بحبي له و حبي للرسول! مكنتش هسمع عن الرسول أصلاً!
مكنتش هاعرف أبي و أمي! و مكنتش هاحس بحبهم و سعادتهم بي, مكنش هيمر بي أمور تعلمني و أمور تسعدني, كان هيفوتني جمال الكون اللي ربنا خالقه عشان الإنسان كان هيفوتني نعم ربنا كلها اللي لو حاولنا نحصيها مش هنغرف!
قد إيه كان هيفوتني حاجات كثيــــــــــــــــــــــــــــرة أوي كده!!! و إن أي واحد تُوفّي يتمني يرجع يعيش لحظة كمان.
الحمد لله انك خلقتني من بني آدم و كرمتني و أتممت نعمتك عليّ بجعلي من أُمَّة محمد سيد الخلق =)
الحمد لله يا رب انك اخترتني و خلقتني و سواء كنت بضيف في الدنيا أو لأ فأنا سوف أجبر نفسي علي أن أضيف في الدنيا عشان أستحق نعمتك عليّ يا رب,


) وَلَقَدْ كَرَّمْنَا بَنِي آدَمَ وَحَمَلْنَاهُمْ فِي الْبَرِّ وَالْبَحْرِ وَرَزَقْنَاهُمْ مِنَ الطَّيِّبَاتِ وَفَضَّلْنَاهُمْ عَلَىٰ كَثِيرٍ مِمَّنْ خَلَقْنَا تَفْضِيلًا  ( (الإسراء 70)
اجتهد مكانك أينما كان عملك و أياً كان دورك مهما استصغرت دورك متقعدش تقول مبعملش مبزودش مليش لازمة! فربنا خلقك عشان دور معين  فأتقن ما وُكِلت اليه و ابحث علي ما تتقرب به زيادة إلي الله