إياكي وهذا الرجل

كل بنت بتحلم باليوم اللي هتلاقي فيه فارس أحلامها واللي هيحبها ويسعدها وتختلف طرق إسعادها من كلام, مفاجئات, هدايا , حنان ورعاية أو بمعني أوضح وشامل من يودها ويرحمها كما قال الله تعالي " وَجَعَلَ بَيْنَكُم مَّوَدَّةً وَرَحْمَةً " صدق الله العظيم
لكن مش كل الأحلام دي هي الحاجات المهمة مش مهم قد ايه هيفسحني ولا هايجيب لي هدايا اه هما حاجات مهمة بس الأهم الرجل ده هيدخلك الجنة ولا لأ ؟! الرجل ده يوم القيامة ربنا هيعاتبك انك وافقتي عليه؟ هيقولك وافقتي عليه وهو مبيصليش ليه ؟ ولا الرجل ده هيكون السبب إنك متدخليش الجنة؟!! انت الوحيدة اللي تقدري تجاوبي علي السؤال ده بس في حاجات ممكن تعدي علينا كبنات بسبب فرحتنا بالإرتباط
-إياكي تتجوزي واحد مبيصليش الفجر:
      ليه؟ عشان اللي مش قادر يقوم 10 دقائق في السقعة ولا عشان تعبان عشان اللي خلقه مش هايقوم عشان مخلوق احتاجه في الوقت ده, ولو قام مره مش هايقوم كل يوم! ولو قام كل يوم! ساعتها هتعرفي هو بيقدر مين علي مين! ودي مصيبة أكبر


-إياكي تتجوزي واحد لا يقرأ القرءان :
        عشان ببساطة اللي مش لاقي وقت يقرأ كلام اللي خلقه 3 دقائق في اليوم مش هيلاقي وقت يكلمك 3 ثواني ويمكن مايسمعكيش كمان :)


-إياكي تتجوزي واحد من بتوع "عادي" :
     بتاع "عادي" ده اقصد بيه اللي لو بنت مرت قدامه لابسه مش تمام مش هايدور وشه هيقولك عادي ماهتمتش! أو لو واحدة طول الفيلم مش لابسة محترم هيكمل الفيلم عادي جدا هيعمل ايه هي اللي لابسه كده طول الفيلم!
ده ببساطة ضرب بأمر الله عرض الحائط لما ربنا يقول له "قُل لِّلْمُؤْمِنِينَ يَغُضُّوا مِنْ أَبْصَارِهِمْ وَيَحْفَظُوا فُرُوجَهُمْ ذَلِكَ أَزْكَى لَهُمْ إِنَّ اللَّهَ خَبِيرٌ بِمَا يَصْنَعُونَ " (النور 30)
وهو عادي! يبقي عمره ما هايحترمك انتي لما تبقي واقفة جنبه برضه هيبص! سواء استمتاعا بها أو نظرة عادية فالنظرة العادية لها وقعها في نفس الرجل مهما كان فالله الذي خلقه أعلم به وأمره بذلك يبقي أكييد في سبب!


من الآخر كده الخلاصة  ماتخديش واحد بيفضل مُنعم عليه علي المُنعِم ذات نفسه, ماتخديش واحد يفضل مخلوق علي اللي خلقه عشان بكل بساطة هو مبيفضلوش هو بيهاوده وشوية وهايتغير والمشكلة انه فضله علي الله عز وجل.
لو جوزك أو خطيبك كده اقعدي اتكلمي معاه بهداوة قوليله انا نفسي ندخل الجنا ايدينا في ايد بعض نفسي نكون سبب دخول الجنة لبعض تعالي نقرأ ورد سوا, كل واحد يصحي التاني يوم ابتكروا!
ابتكروا طريقتكم لدخول الجنة, ابتكروا سبيلكم للجنة =)

من سنة

من سنة فاتت قررت قرار فجائي اعمل blog
 عشان كل الناس عندها واحد :D ولما بدأت اكتب فيه فوجئت ان لازم يكون ليا دافع اكبر من كده، دافع ميخليش الناس تعجب بيا لأ يخليه سبب ولو بسيط يدخلني الجنة وقررت يكون مكان اكتب فيه كل اللي بتعلمه وبحسه وانتقد فيه كل مالا يعجبني أو أراه ضد تعاليم ديني وانصح فيه بطريقة بسيطة كل من يضل عن طريق الصواب.
وفوجئت إني تعلمت منه كتيير اوييي بجد تعلمت مليون مرة ضعف اللي ممكن أكون علمته لحد، ممكن أكون لفت نظر واحد أو أتنين لحاجة بس أنا تعلمت من ال 87  post   من كل كلمة فيهم من كل حرف وعشان اكتب كل حرف سمعت وقرأت عشان مبقاش بهذي اصل ممكن يكون ذنب في رقبتي إني أقول حاجة غلط فكان لازم توخي الحذر وإتقان العمل.
 ال blog  ده علمني كتيير اوي ويارب أكون علمت حد حرف واحد بس عل وعسي ان يدخلني به رب العالمين الجنة

Did You?!

Each Day ask yourself a question

What did I add to the world today?

And think carefully in each action you did whether it's small or huge, and be sure that no one could have done it except YOU.

Ok, what about if you didn't do anything?! don't lose hope and ask yourself another question !

Have I taken any steps towards adding something to the world soon?

If you didn't find an answer Then stop! And reformulate your day, have a goal and plan to reach it!

And finally remember:

“If you can't do great things, do small things in a great way.” 

―Napoleon Hill

&

 "عن عمره فيما أفناه وعن شبابه فيما أبلاه"

فكر....نفذ!

 في "من شب علي شئ" تكلمنا عن حاجات كثيرة بنغفل عنها في حياتنا اليومية و تجاوزات بنسمح بيها بس للأسف الحاجات الصغيرة دي دائــماً بتتراكم و تبدأ في تدمير أو تشويه ما تحاول بنائه علي مر السنين  و كان تطبيق الكلام ده علي تربية أبنائنا المرة دي بقي هنطبق الكلام ده علي أنفسنا و كيف أن عمل صغير نفعله ودون أن ندري يقودنا إلي "الشرك الأصغر", يعني ايه اصلا شرك أصغر!
الشرك الأصغر هو تنفيذك لأي عمل ونيتك لأحد من خلق الله عز وجل في عمل كان يتوجب عليك أن تكون نيتك خالصة لله
فعن محمود بن لبيد رضي الله عنه أن رسول الله صلى الله عليه وسلم قال: ((إن أخوف ما أخاف عليكم الشرك الأصغر))، قالوا: وما الشرك الأصغر يا رسول الله؟ قال: ((الرياء ((
قبل أن ابدأ في كلامي فأنا لا اتهم أحد بالشرك فأنت لا تحاسب علي فعلك لشئ وأنت تجهل أنه حرام, إنما تحاسب عليه بدءا من لحظة معرفتك لحرمانيته.
فلنذكر أفعال يفعلها البعض ليرضي الناس ويشركهم في نيته التي كانت من المفترض ان تكون خالصة لله وحده سبحانه وتعالي.
-يصلي ليسكت أهله
-ترتدي الحجاب لترضي صاحبها!!أو تمتنع عن ارتداء نوع أو شكل معين من الملابس كي ترضيه.
-من يقول كلمة حق ليرضي الناس لا ليحق الحق.
-من يقول أي كلمة ليرضي الناس حتي وإن كانت تغضب الله.
ليه كل ده شرك أصغر؟ عشان بكـــل بساطة! أنت بتعبد مين فيهم؟؟
أهلك اللي جيت علي نفسك وصليت عشان تخلص من الخناق بتاعهم عندك اكبر من اللي خلقك؟ قد كده بتستصغر غضب ربنا وتُعلي أهلك عليهم؟ ما أنت أولي تيجي علي نفسك عشانه مش عشانهم! والصح انك تصلي بحب مش بتعب كده.
و أنتِ بتعبدي مين فيهم؟ لما ربنا قالك الحجاب فرض بقي خانقة ومش علي الموضة ومش مُحضرة نفسيا اني ألبسه ولسه صغير و الخ الخ, ولما هو قالك عليه؟ خوفتي تخسريه صح؟ وبعدين ده هيبقي جوزك فلازم ترضيه...حلو أوي أولا انت مش ضامنة انه يكون جوزك مهما ضمنتي هو كويس ولا وحش انتِ ماتعرفيش الغيب, ثانينا لو حصل ومبقاش جوزك هتقلعي الحجاب بقي؟ ماهو أصلا كان عشانه! , ثالثا:  ليه تسيبي عبد فاني يتحكم فيكي و ممتنعه عن ارضاء اللي خلقك وخلقه!!!
قبل ما تعمل حاجة أو تقول كلمة أو تكتبها فكر لحظة مع نفسك انت بتقول كده عشان مين؟!! وهتعمل كده ليه! ان مكانتش نيتك لله أو في حد دخل مع ربنا في نيتك متعملهاش! لأن ساعتها الحاجة دي هتكون عليك بدل ما تكون ليك.
و ان كنت وقعت في هذا الخطأ من قبل فلا تيأس وتذكر قول الله تعالي
"` قُلْ يَا عِبَادِيَ الَّذِينَ أَسْرَفُوا عَلَى أَنفُسِهِمْ لَا تَقْنَطُوا مِن رَّحْمَةِ اللَّهِ  إِنَّ اللَّهَ يَغْفِرُ الذُّنُوبَ جَمِيعًا إِنَّهُ هُوَ الْغَفُورُ الرَّحِيمُ"
اللهم بلغت اللهم فاشهد.