وقفة مع النفس

مشكلتنا في الحياة هي كلمة "عادي" كلمة بتحلل حاجات حرام كتيــــر أوي, وبتخلينا نرتكب معاصي إلي أن نعتاد عليها وندافع من أجلها لو غلّطنا حد وتوصل اننا نعاند مع ربنا ونستمر فيها لو اكتشفنا انها حرام! عشان ايه؟ عشان مبقناش نقدر نستغني عنها رغم لو اننا كنا معملناهاش من الأول كنا قدرنا نعيش من غيرها وعيشتنا كان زمانها احسن وأحسن, بس الفكرة اننا نقدر نستغني عنها, أيوه نقدر! احنا بس اللي بنكسل نروض نفسنا وأقصد ب"نفسنا" دي "النفس البشرية" اللي لو مروضتهاش هتٌحِط من قدرك الي قدر الحيوان الذي لا يمنع نفسه من أي شئ يشتهيه "أي شئ" !

بتوصل اننا بنعلي "نفسنا" علي خالقها "الله سبحانه وتعالي" وبنتبع هوانا ليه؟!! عشان بس احنا عايزين الحاجة دي وربنا قال لنا "لأ" و "اصبروا" و "استعينوا بالصبر والصلاة"  بس احنا اللي نفسنا عندنا أغلي من "الله عز وجل"

الفكرة فعلا انك لو وقفت وقفة محايدة كده وفكرت هتلاقي ان اي شئ ربنا أمرنا منعملوش

مش هتخسر حاجة لو بطلته, الواحد نفسه بتقول "ليـــه ابطله" , إجابة السؤال ده اجابة واحدة وإن لم تكن كافية فعليك مراجعة نفسك ألا وهي "ربنا أمرنا بذلك" لو برضه قالت لك " بس أنا برضه عايز كده" ! قلها "هنخسر ايــه يعني لو معملناهوووش ؟!" ولو موصلتش لإجابة مقنعة اعلم انما هو كِبر  النفس عن التخلي عن ما تريد, وانها تريد ان تعلي هواها علي ارادة الله عز وجل.

مثلا مين قال ان عادي ان الرجل يتفرج علي فيلم فيه امرأة مش محتشمة؟ دي بقت حاجة عادية جدا ورد معظم الرجال عليها "مش بركز" أو "عادي" أو "هبطل اتفرج علي أفلام يعني؟" طب هسألك سؤال هل ترضي أن زوجتك أو اختك أو امك تري عورة رجل في التليفزيون؟ مع العلم انها مش هاتركز برضه؟!!

جسد المرأة عورة ما عادا الوجه والكفين يا رجال المسملين =) فمالا ترضاه لأختك لا ترضاه لنفسك, ومش هتنقص ايد ولا رجل انك ماتتفرجش علي كل الأفلام يعني! هيحصل ايه؟ لا الدنيا هاتقف ولا هتبقي متخلف مثلا, انما الفكرة انك تكون كسرت ال "عادي" ورضيت الله عز وجل.

في أمثله أخري كتيـــرة جداً   ده اللي جه في بالي دلوقتي, تذكر في النهاية قول الله تعالي

" إِنَّ السَّاعَةَ آتِيَةٌ أَكَادُ أُخْفِيهَا لِتُجْزَىٰ كُلُّ نَفْسٍ بِمَا تَسْعَىٰ ﴿15﴾ فَلَا يَصُدَّنَّكَ عَنْهَا مَنْ لَا يُؤْمِنُ بِهَا وَاتَّبَعَ هَوَاهُ فَتَرْدَىٰ      "