التدبر

مواقف كتير بتعدي في حياتنا وبإيدك انت تخليها تمر مرور الكرام أو تعلم فيك، بإيدك تدوّر علي حكمة ربنا في كل موقف يمر بينا أو نقعد نقول أهو ده قدرري ونصيبي وده المكتوب لي وآخذه كده مسلم بيه!! هو اه لازم تسلم أمرك لله وحده عز وجل ولا تعترض علي حكمته في هذه المواقف الفكرة فإنك تتدبر الموقف وتدور ربنا عايزك تتعلم ايه من الموقف ده.

قريب افتكرت فجأة موقف حصل لي من حوالي 4 سنوات او 5 كمان مش فاكرة امتي بالظبط بس موقف عمري ما هانساه بس عمري ما اتعملت منه غير ساعة لما افتكرته قريب.

كان يوم جمعة وخارجة مع أهلي عادي جداً! كان ساعتها منتشر أوي سرقة أي حاجة حديد بس اللي كان معروف ساعتها أبواب مداخل العمارات, فأنا سبقت في النزول ووالدي حصّلني وأنا ماشية في المدخل لقيت فجأة والدي بيندهلي من شباك السلم وعمّال يقولي "اقفي اقفي"!!! فوقفت مكان وأنا مش فاهمة هو ايه طلعه أصلاً وبيندهلي ليه فنظرتله وقلت له في ايه؟ فشاورلي قدامي علي الأرض فإذا بي الاقي ان غطاء البلاعة الحديد مسروق! والبلاعة مفتوحة قدامي وكنت هقع فيها! (بلاعة كبيرة مش مدورة صغيرة زي اللي في الشارع) فافضلت متنحة شوية كده وبعدين نسيت ، لما افتكرت الموقف ده من كام يوم قلت لنفسي هو ايه اللي طلع والدي يبص من الشباك يومها؟ وفي توقيت دقيق جدا فعلا قبل ما أمد رجلي وأقع فيها! 

الفكرة ان طلوع أبي من الشباك اليوم ده كان قدر ومكنش ينفع والدي يعارضه يعني مهما كان حصل وعطّله فكان برضه هيبص من الشباك وياخد باله عشان ربنا كان عايز يحميني وميجراليش حاجة يومها.

اللي اتعلمته من الموقف ده ان ربنا خير " مُدبّر" فعلا وان في تفاصيل كتيــــــرة جدا في حياتنا اليومية بتحصل واحنا واخدنها كده for granted  وفي مخاطر كتيــرة جدا ممكن تصيبنا لكن الله عز وجل بجد بيحمينا منها! كام مرة حاجة طارت وخبطت في حاجة جنبك بالظبط ومجتش فيك؟ كام مرة تحصل حادثة في مكان  كنت لسه فيه؟ حتي لو مكنش صادف وحصل لك حاجة من دول فأكيـــد اكيد في حواليك حاجة ممكن تضرك صغيرة أويي وربنا حافظك منها ده جورج هيربرت    مات من قرصة ناموسة!

فكل يوم بليل قبل ما تنام احمد ربنا قول له"يارب انا بحمدك علي كل حاجة انا مش واخد بالي منها"

وفكّر في كل موقف ربنا كان عايزك تشوف ايه، تسمع ايه، يجي في بالك ايه عشان بجد مافيش حرف بتسمعه في حياتك بتسمعه عبثاً =)